【On.cc】海俊傑現身交代太太病情 逐一解釋盼釐清誤解藝人海俊傑上周六（8日）忽然聲淚俱下拍片，公告其化妝師太太莫家慈患急性肝硬化，於內地醫院急需籌錢70萭元換肝，引爆全城關注，令人擔心。事隔數日，海俊傑終於再次現身網絡，發文交代太太病況，並親解急需百萬醫療費及上廣州求醫原因。海俊傑太太莫家慈患急性肝硬化。海俊傑日前聲淚俱下拍片，嚇親大家。佢提到自己一家一直住內地，所以同屋企人商量後，決定轉到廣州嘅醫院醫治太太，不過太太情況比較嚴重，留院入住後大概五日左右，病況出現好多未能預料嘅變化，需要轉到ICU作出緊急治療，佢自己亦都受打擊下拍咗片放上網，搞到大家咁擔心：「由於可能有機會配對，我亦都需要了解手術建議及醫療費用。醫院嘅收費透明度高，醫生認為太太的病情嚴重，醫院方面估算手術費50萬，但除手術費外其實亦都會繼續衍生不同嘅醫療項目費用，經初部計算前後至少要過佰萬。由於我哋一家原有儲備已在耗損情況下，難以承擔持續增生嘅醫療費用，所以喺心情好徬徨不安嘅情況下，好抱歉拍咗條片令到大家擔心。片段出街之後有好大嘅回響，收到好多人嘅支持同關心。特別感激公司 天盟娛樂培哥，演藝人協會，會長古天樂先生，曾志偉先生，以及好多圈內外好友的幫忙，感激不盡。」佢亦表示太太狀況每日需要同醫護團隊協調同部署，佢目前為止亦只可以同大家分享到呢個狀況，盼釐清誤解，並再次感謝各位對呢件事嘅關注，多謝幫助過佢哋嘅人，希望大家可以繼續為佢太太禱告，並祝福所有人都要身體健康。海俊傑表示自己徬徨不安下先會拍片。佢表示依家仲要日日留意住太太病情。
