香港流行文化節丨泳兒撐菠蘿油代表香港文化 黃洛妍驚喜獻唱未派台單曲.第四屆「香港流行文化節」四月載譽歸來，今年以「超乎想像」為主題，探索創意碰撞，感受跨代創作人如何以超凡想像重塑香港流行文化獨特面貌。重頭節目《ImagineLand》戶外音樂嘉年華於4月25及26日一連兩日喺香港文化中心露天廣場同梳士巴利花園草地舉行，免費開放畀市民同旅客參與。「跨越界限音樂會」森舞台邀請咗11個演出單位，雲集本地音樂新勢力、唱作人、樂隊，以及來自內地同泰國嘅歌手，以不同曲風演繹流行音樂，打破界限。

首日音樂會已經圓滿完成，打頭陣嘅泳兒一口氣唱咗8首歌，包括新歌《散光》，亦有早期作品如《感應》同《花無雪》，希望帶畀現場觀眾一啲回憶。泳兒表演完之後話好盡興，因為佢好鍾意唱Live，今次音樂會唱咗好多佢好想唱嘅歌。泳兒仲話食物都好代表香港流行文化，佢喺外國時會好掛住菠蘿油，每次返到香港食菠蘿油就會有好親切嘅感覺。接著出場嘅係來自泰國嘅女歌手New Napassorn，泳兒一盡地主之誼同佢合唱咗ROSE嘅《number one girl》。New話佢第一次嚟香港表演，觀眾嘅熱情反應令佢好驚喜。

之後出場嘅有黃洛妍（Janees）、組合ROVER同晚安莉莉，都係新世代音樂名字。Janees今次首演從未公開嘅作品，仲演繹咗未派台嘅個人單曲《槍與玫瑰》，話啱啱拍完MV。ROVER一上台，現場大部份女粉絲即時尖叫，佢哋話好感恩啱啱完成演唱會，就緊接可以喺美麗嘅維港背景下再次玩Live。主音希晉同晚安莉莉合唱咗Lolly Talk嘅《三分甜》。晚安莉莉喺台上亦唱咗8首歌，包括剛派台嘅新歌《當我們不再說晚安》，佢哋嘅日系搖滾風格將為香港樂壇闖出一片天。音樂會最後由DJ DEANZ將文化中心露天廣場變成大舞池，以跨越世代嘅經典旋律喚起大家集體回憶。TVB