魔音女團觀塘拉票 莊子璇陳熙蕊獲媽媽現身支持 鄧凱文失準自責令家人失望.無綫熱播節目《魔音女團》本周進入成團階段，16位練習生今日（10日）雲集觀塘拉票表演，場面熱鬧。適逢母親節，鄧凱文、王汛文、莊子璇、陳熙蕊及蔡華英都邀來媽媽或嫲嫲到場打氣。陳熙蕊媽媽更專程由美國返港，大讚愛女進步不少，令陳熙蕊感動哽咽；莊子璇媽媽則「惜字如金」，要阿女代為「翻譯」，場面溫馨又搞笑。

16位練習生分4組唱跳，宋宛穎、倪樂琳等表現突出，但鄧凱文跳舞繼續甩拍子，而「魔音」俞可程就中規中矩。鄧凱文受訪時解釋，團舞拍攝已完結一個月，加上今日心情唔好先失準，更自責話：「其實每次正式演出我都跳到㗎，今日媽咪同婆婆嚟支持我，令佢哋失望添！」俞可程力撐好姊妹，仲自爆：「𠵱家我唱歌進步咗，陳潔靈老師都讚我做到，但好多人想我表演走音版。其實當初甩轆嘅表現先係最真實嘅自己，我唔介意畀觀眾見到！」講到成團信心，鄧凱文笑言：「有啲綜藝會將啲唔得嘅人塞入去，大家Take it easy啦，總要有我哋呢啲氣氛擔當，人無完美嘛。」

自組組合「S.H.E」嘅三位港姐冠軍莊子璇、倪樂琳及宋宛穎姊妹情深厚，笑言成團與否都會「原地出道」，仲話要搵金主投資。原來三人想過同居或搬近做鄰居，但前提係要賺到錢先。宋宛穎同倪樂琳被視為成團大熱，佢哋謙稱成個節目所有練習生表現如過山車，未到最後一刻都未知結果。莊子璇坦誠表演時想快啲完結免出錯，冇完全配合隊友。問到未來五集會唔會進步神速令人跌眼鏡，佢竟話：「𠵱家咁樣幾好囉，大家都對我跌晒眼鏡，可以執番啲眼鏡。」至於被評審批評會否唔開心，佢話：「唔會，你哋睇得好中肯。」宋宛穎就話成個比賽都冇家人陪，好在有兩位好姊妹，今晚母親節莊子璇同倪樂琳都爭住請佢返屋企作客。

陳熙蕊同喬美莎同組，台上表演後自爆兩人相差12歲。喬美莎廣東話進步神速，但錄製節目時新傷舊患齊出現，目前正接受治療。佢賣口乖話完全睇唔出陳熙蕊真實年齡：「以為佢25歲，我個樣又比真實年齡大，人哋可能以為我哋同齡。」陳熙蕊笑住話：「真係多謝你，我25歲嗰年喺度參選港姐啦。」喬美莎透露腰同大腿都痛，醫生話壓力都有影響。陳熙蕊就話每日練舞超過10小時，膝頭哥不停撞地，瘀傷比拍《刑偵6》被強暴戲時仲誇張，遲啲會分享照片。

陳媽媽專程由美國返港支持，陳熙蕊話：「媽咪原本要北上，為咗支持我改晒火車同酒店，好感動。家人長期唔喺身邊，今日好有意義。其實參選港姐時已經想講呢番話，只係當時我入唔到五強，冇機會。」TVB