蔡子健轉行做財務策劃師兼大學教書 回忆當年離開因發揮唔到價值.前無綫資深藝人蔡子健今日（11日）驚喜現身一個劇集宣傳活動，即時勾起唔少觀眾嘅集體回憶。自從2009年正式離開演藝圈後，蔡子健好少喺公開場合露面，今次現身令唔少人猜測佢係咪準備「全面復出」。不過蔡子健就笑言唔係，透露今次出席活動純粹係受導演邀請，只係「玩吓」性質。佢話自2009年離開TVB至今已經十幾年，期間完全轉行，𠵱家嘅主力工作係做財務策劃師，同時亦喺大學執教，仲從事企業培訓工作。

講到當年轉行最困難嘅地方，蔡子健坦言「讀書」係最大挑戰。為咗轉行，佢投入大量心血不斷進修：「我諗最困難都係讀書，因為不停咁去進修，不停咁去考試。我離開咗之後，完成咗碩士學位，亦完成咗博士學位，仲考咗唔同嘅專業資格，付出咗好多心血同心機。𠵱家我仲努力緊，我諗行行出狀元，各個行業都需要擺時間同心機。」

對於當年為何喺當紅之際選擇離開演藝事業，蔡子健坦言：「當你喺某一個地方發揮唔到你嘅價值，咁你就要搵第二個平台。」被問到離巢前係咪工作量大減，佢話太耐唔係好記得。至於無綫有冇搵佢返去拍劇，佢話「冇」，但如果真係搵，佢都樂意：「千祈唔好咁講，我哋呢啲小角色，唔敢講。不過如果真係搵，我都樂意嘅，你睇今日幾多人才，我哋呢啲已經過咗氣嘅老人家。」TVB