愛回家｜神秘女神降臨引爆安凌CP爭風呷醋

TVB王牌處境劇《愛．回家之開心速遞》近日劇情相當精彩，前晚（19日）一集「來讓我守護你的不完美」中，送水輝（許家傑飾）因擔任集團漢堡店代言人，被不法之徒以昔日脹爆身形跳肚皮舞嘅舊照勒索，壓力爆煲下狂食漢堡減壓，搞到體重飆升變成肥仔。送水輝羞於面對大小姐（林淑敏飾）而避世，點知被三太（樊亦敏飾）發現，仲策劃「重拾自信計劃」，戴住「大小姐面具」化身魔鬼教練，鞭策送水輝做運動減肥。與此同時，大小姐亦揭發老公慘墮「漢堡地獄」，決心暗中守護，場面又搞笑又感人。

許家傑接受訪問時透露，為咗演活脹爆Look，原本打算用棉花塞口，但林淑敏提議改用冬甩，「因為就算吞咗落肚都唔驚」。佢又感激林淑敏同佢一齊研究肥胖人士嘅肢體動作，大讚對方好Sweet。許家傑話最大難度係要邊食漢堡邊講對白，同時避免誤吞冬甩影響連戲，仲要戴假肚著「肌肉衫」扮肥，外景拍攝時熱到成身汗，但為咗觀眾睇得開心，再辛苦都值得。佢仲大讚劇組貼心，所有漢堡包都係即場買，確保新鮮。

明晚一集將有「神秘女神」降臨，一張印有藍玫瑰圖案嘅被袋從天跌落朱凌凌（吳偉豪飾）房間窗外嘅水管上，金城安（周嘉洛飾）同朱凌凌各自幻想物主係「美女藝術家」同「女霸總」，二人為咗引出女神現真身，各出奇謀搞到爭風呷醋，好兄弟情面臨重大考驗，場面胡鬧搞笑，勢必令觀眾笑爆嘴。

而後晚一集就緊貼油價飆升議題，劇情講述根叔（劉丹飾）為咗減輕「速熊運輸」營運成本，諗出「動物海陸空大作戰」度過油價危機，點知反而搞到一鑊泡，熊家上下各出奇謀幫手。一貫「有破壞冇建設」嘅金城安更提出「絕世好橋」，最終成也李莫愁敗也李莫愁，相當耐人尋味。想知道神秘女神真身係邊個、安凌CP兄弟情會否決裂、根叔能否成功化解危機，就要繼續收睇《愛．回家之開心速遞》喇！TVB