馬刺G3戰報📝

賽前聽到霍斯（De’Aaron Fox）回歸、夏柏（Dylan Harper）無恙，馬刺迷先放下心頭大石，而一開波嘅15-0 攻勢，打出NBA季後賽史上第二佳開局，反而未有喜出望外，因為深知雷霆唔會嚇怕，果然當Wemby休息，OKC好快趕上，幸好復出嘅霍斯首節已攻入9分，加上Wemby三分2射2中，先得以領先31-26。

第一節另一焦點，是雙方爭波出界後，見到Wemby有拉住J-Will手臂，結果OKC挑戰成功，由出界變成Wemby犯規；之後J-Will再製造Wemby進攻犯規，令佢首節已錄得2犯。

SGA首節一分未得，係對上四季首次，都見到馬刺如何集中防守，希望凍結呢位MVP；不過呢個亦都意味其他雷霆球員有更多機會起手；今場早段嘅奇兵係積連威廉士（Jaylin Williams），三分4射3中（最後為6射5中），有效拉出咗Wemby。

對馬刺來講，卡魯素（Alex Caruso）嘅老油條打法極為討厭，亦極有效率，佢除咗好多小動作，都把握每次機會，等球證「睇見」犯規，呢個喺籃球世界尤其重要。喺佢嘅一再纏擾下，馬刺第二節中段節奏大亂，攻守都出現無謂犯規，甚至莊臣（Keldon Johnson）運球時被迫得手踭打中米曹（Ajay Mitchell）。雷霆第二節打出32-20，令佢哋可以領先7分進入下半場。

下半場嘅馬刺仍然過於心急，一方面雷霆堵塞咗Wemby中路嘅空間，令佢進攻受限；如非三分維持喺四成左右嘅水準，咁肯定被拋離更遠。至於雷霆就由SGA帶領，以更多嘅傳球同跑動，創出更好嘅出手空間。Wemby頭兩仗上陣達86分鐘，係佢三季以來生涯上陣時間最多嘅兩仗，體力難免受到影響，而馬刺一直想打陣地戰，但喺雷霆外線積極干擾下，卻始終無法好好傳波，而Wemby亦未能佔好位置。霍斯上半場表現出色，但下半場明顯因為傷勢問題而慢咗，幸好佢與Wemby嘅擋拆仍能發揮威力，喺第三節尾後成為主攻策略。

雷霆今仗嘅防守極其難搞，佢哋好聰明地以唔同嘅小動作令馬刺小將變得毛躁，自亂陣腳；反觀馬刺強打雖能搏到犯規，喺罰球數目上壓過對手，但始終未能令雙塔因犯規問題而坐低；反而繼續有好表現嘅卡魯素再次不斷令馬刺防守者犯規，尤其係內收肌（adductor）受傷嘅夏柏。

第三節尾段霍斯同多特（Lu Dort）爭波時再次觸傷右腳足踝傷患，狀甚痛苦，要立即落場休息，令馬刺更陷被動；就算Wemby完此節前轉身射入fadeaway，仍只能追到85-94完此節。喺無人可用下，霍斯於第四節忍痛上陣，但作用不大。

馬刺出盡法寶，賽前Wemby就要助教拉手拉腳，等佢適應雷霆嘅高強度對抗；而主場球迷亦冇得閒過，除咗喺赫頓史甸（Isaiah Hartenstein）上陣時狂叫You pull hair，更有球迷專登穿上「泡泡衫」，來諷刺SGA嘅打球方式。名宿如大衛羅賓遜（David Robinson）、鄧肯（Tim Duncan）、艾華利莊遜（Avery Johnson）及保雲（Bruce Bowen）等亦有到場打氣；雖然有部份球迷高呼懷念保雲，但果d都係馬刺嘅黑歷史，絕對唔值得學習。

雷霆今仗可以贏123-108，反超前2-1，最大原因係更有耐性，等待更好嘅機會出手；而喺兩日一戰嘅賽程下，首戰就打到雙加時，明顯對很多球員造成影響。只有SGA仍然能維持水準，今仗佢取得26分及12次助攻，不斷搵到吉位嘅隊友出手，亦能把握馬刺過於貼身嘅防守，12次站上罰球線而全中。

雷霆今仗用上9人輪替，但後備狂轟76分，係隊史紀錄，首功係麥簡恩（Jared McCain），喺呢場重要嘅比賽雖然三分唔算準，但多次上籃得手，24分係季後賽生涯新高。反觀馬刺雖然都係9人輪替，但夏柏明顯未喺狀態，卡達拜仁（Carter Bryant）嘅防守亦開始被人識破，加上莊遜亦太心急，雙方板凳嘅貢獻成為勝負分野。

雷霆重獲主場優勢，馬刺必須保住下場主場，先有望挑戰。當務之急係好好養傷，而進攻上嘅陣地戰及快攻嘅平衡亦要做得更好。雷霆表現出來嘅冷靜、信心同耐性，極值得馬刺學習。上場嘅卡斯圖（Stephon Castle），今場嘅Wemby，賽後都有提到，自己要打得似Team Player，多俾隊友參予進攻，唔可以只睇見籃框，呢個都係重中之重。

有打籃球嘅朋友都會明白，球證未必睇到每個犯規，有時更會出現偏頗，如太易動氣，甚至想住以眼還眼，只會令形勢更差。呢個都係年輕嘅馬刺球員，要學懂嘅課題。

文章擇自- 仙道彬手記🏀