曾志偉自組班底開拍懸疑劇《狩謊》 成毅夥拍梁家輝袁詠儀莫文蔚鬥戲.曾志偉年初辭去無綫高職後一直未有公布新動向，原來佢已低調自組班底，以公司名義同內地影視平台合作，邀請《寒戰》導演之一陸劍青聯手，打造18集港風懸疑劇《狩謊》作為「創業作」。志偉除咗以配角身份參演，仲碌盡人情卡，邀得梁家輝、成毅、袁詠儀同莫文蔚等重量級卡士加盟，陣容被形容為「電影級豪華戰團」，暫定本月23日喺香港開鏡。

內地「古裝男神」成毅早前同經理人公司結束8年合作，自立門戶重新出發，今次挑戰時裝劇，更因應角色需要苦練廣東話。由於內地新規定「演員表唔准單獨用藝名」，今次官宣男主角欄寫上「傅詩淇（成毅）」，引來網民笑稱「傅詩淇正式出道」。志偉對成毅賞識有加，大讚佢「好努力、有內涵、好專業」，更透露成毅提早個幾月到港準備，同執法人員及心理學專家取經。未正式開拍，《狩謊》已獲頒「最具期待作品」，志偉承諾會努力拍好戲。

盛傳將加盟嘅袁詠儀近日雖然忙於同余香凝趕拍電影《慾望寄生》，但佢同老公張智霖同成毅交情匪淺，2016年喺綜藝節目《一年級．畢業季》已結緣，年前張智霖同成毅拍《赴山海》，靚靚更專程探班。今次能夠同成毅鬥戲，靚靚樂於奉陪，不過受訪時依然保持神秘，只簡單話「傾過吓咁囉，哈哈！」曾志偉呢次出手，勢必為港劇帶來新氣象。