Peter坦言球星花名難再現 《NBA地帶》長留心中滿感謝以前每到星期日，就會早早打開電視機，睇完《NBA地帶》再睇《球迷世界》，假如冇呢兩個節目，相信自己好難會對體育產生興趣（當然更早時間已經睇緊潘宗明嘅《體育世界》講）。除咗張丕德，《NBA地帶》尚有其他拍檔，包括最初嘅李潤琪及王艷娜，之後加入嘅徐嘉樂，還有後來跳舞比講波出名嘅蔡錦豐，當然少不得幕後功臣簡而清先生，無佢嘅努力，我哋都唔會有如此多嘅球星花名。31年過去，《NBA地帶》早已超越集體回憶，甚至係NBA球迷嘅啟蒙之作，當年Peter還係懵懂嘅rookie，今日早已成為球迷心目中嘅評述GOAT。//誤打誤撞由銀行界跳入評述界，喺好多聽廣東話長大嘅球迷心目中，張丕德（Peter）嘅地位，就似係湖人傳奇評述員Chick Hearn，如果少了佢嘅聲音導航，比賽就變得乏味，難怪唔少球迷，都認為Peter係佢哋心目中嘅評述GOAT。由《NBA地帶》開始，31年來始終如一，可惜的嘅係，近年好嘅評述買少見少，有部份有籃球資歷，但未有時間好好訓練講波技巧，有d就做唔夠功課，評述時少咗份見識。提到《NBA地帶》，好多球迷最難忘係球星起嘅花名，多年之後，「夢中人」、「郵差」、「墨屎」、「泥水佬」、「神奇小子」、「鬼見愁」、「魔鬼山」、「無法無天」、「牙擦蘇」、「大口仔」、「眼鏡蛇」、「二哥」、「入樽聖手」、「死光槍」、「大猩猩」等，全部都深印腦海，有部份甚至比球員嘅本名更難忘，例如爵士嘅孖0號中鋒奧斯塔治（Greg Ostertag），大家可能只記得「廢柴」呢個綽號，至於當年公牛嘅兩頭「牛」：「加拿大牛」尹寧頓（Bill Wennington）同「澳洲牛」朗尼（Luc Longley），同樣深入民心。//文章擇自-仙道彬手記🏀
