受關注度跌咗唔少嘅洲際冠軍球會盃（豐田盃前身），今屆由「歐洲冠軍」巴黎聖日門迎戰「美洲冠軍」嘅費林明高。費林明高早段有羅斯（Agustín Rossi）不負責任式底線解圍到禁區頂位置，被法比安路爾斯第一時間「彈」入，不過VAR介入認為皮球喺羅斯觸球瞬間已經越過底線，入球被判無效，羅斯算係逃過一劫。不過避得過初一避唔過十五，呢位阿根廷守門員稍後時間應對杜爾嘅傳中處理再次出現問題被卡華拿舒基利亞執雞射入取得領先。換邊後費林明高稍微喺進攻方面有起色，馬昆奴斯喺禁區內踢跌亞拿斯卡達（Giorgian Daniel De Arrascaeta Benedetti）被處以極刑，佐真奴費路射入成1-1平手。及後雙方再無紀錄，需要以十二碼決勝。意想唔到嘅係今場頂替唐納勞瑪嘅俄羅斯龍門沙方諾夫（Matvey Safonov）成為奠定勝負嘅關鍵人物，除咗第一位上場嘅迪亞高迪拿古斯（Diego Nicolás de la Cruz Arcosa）射入之外，包括西班牙中場沙奧尼古斯在內嘅其餘四位球員主射均被其撲出，而巴黎聖日門方面就有應屆歐洲金球獎得主、世界足球先生嘅奧士文迪比利同巴高拿唔入。不過都無傷大雅，巴黎十二碼贏2-1，總比數3-2獲得今屆國際冠軍球會盃，繼法國超級盃、法甲、法國盃、歐洲聯賽冠軍盃、歐洲超級盃後首支囊擴6冠王嘅超級冠軍！🇫🇷🏆🔵🔴
