週中繼續開快車嘅英超，今日凌晨就有下游尾嘅對決。卡斯泰蘭奴斯初來乍到就要以主力上陣，睇得出領隊紐奴對用兵嘅迫切需要。結果賽前經歷9場不勝嘅韋斯咸，將個run in row續加多一場。總體嚟講踢得唔算差，但係功力疲弱係會將防守問題擴大，上季依賴蘇錫（Tomáš Souček）救全家，今季多番柏基達、保雲幾員猛將，但並不足以解決問題。當半場憑藉烏龍波（梅里路擺烏龍）領先一粒，但下半場森瑪維利嘅入球因為卡斯泰蘭奴斯越位在先被VAR剔走就深知不妙。結果被追和後，個可判可不判嘅十二碼，令佢哋主場三分盡失。賽後蘇錫接受採訪，大膽指責當值球證「咁樣執法不如去打籃球」或會受到英足總嘅追加處罰。但就再次佐證，球隊內部氣氛確實唔多樂觀，尤其係領隊嘅紐奴。而今仗過後，韋斯咸亦已落後競爭對手嘅諾定咸森林7分，接落來嘅護級之路甚艱難。至於紐奴嘅命運，就交俾「時間揭曉」。 🏴
