為銜接歐洲主流聯賽嘅跨年賽季制度，日本職業足球聯賽本年度推出僅為期半年嘅過渡性賽事「J1百年構想聯賽」，首輪賽事將於本周五（2月6日）正式展開，並用上以《足球小將》為主題嘅官方比賽用球。
此聯賽旨在配合日職由現行「自然年賽制」（2月至12月）逐步轉型為「秋春制」（8月至次年5–6月），以接軌國際賽曆，提升競爭力並希望球員嘅休息周期更貼近歐洲。
賽事將20支球隊分為東、西兩組，每組10隊進行主客雙循環，共18輪分區聯賽；隨後於6月進入附加賽圈，決出最終排名。雖然本次賽事不設降班制，但為增強競技氣氛，冠軍將直接獲得2026–27賽季「亞冠精英聯賽」嘅參賽資格。此外，賽制更引入「必分勝負」規則：若90分鐘內雙方打和，即直接以互射十二碼決定勝負。十二碼勝方獲2分，負方得1分，務求每場比賽皆有結果及看點。
唔少評論認為，此賽制充滿實驗精神，不僅鼓勵教練大膽試陣、起用新人，東西分組亦增加咗地區打吡戰嘅頻率。加上取消和波、每場必決勝負嘅設計，令比賽節奏更為緊湊、戲劇性提升，被視為一場娛樂性與推廣性兼具嘅足球「大型實驗」。各位又點睇？
日本職業足球聯賽 J1百年構想聯賽 JLEAGUE
文章內容擇自- 足球週刊 Football Weekly HK
