十大中文金曲丨Gin Lee拎四獎成女歌手大贏家.港台第47屆十大中文金曲頒獎音樂會昨晚（24日）喺九龍灣舉行，獲封新外號「Market廷」嘅周殷廷（YT）除咗奪得優秀流行歌手大獎，仲憑《上場》拎埋優秀流行華語歌曲獎，即場獻唱。不過YT全程刻意避開傳媒，以「嚴重鼻敏感」為由拒絕受訪同影相，對自己同飲食界KOL梁雅琳（Hilda）嘅地下情，以及同JACE陳凱詠自炒緋聞引發嘅風波一概封口。到今日下午，YT喺IG出post多謝港台，貼出獎座相並寫道：「A huge thank you to everyone who enjoyed 上場 as well」，繼續懶理外界嘅批評。

至於Gin Lee李幸倪就成為今屆女歌手大贏家，一口氣拎咗四個獎，包括優秀流行歌手大獎、憑《白夜行》奪十大金曲、最優秀流行歌手大獎（女歌手），仲憑專輯《Leap of Faith》首度奪得最佳中文唱片獎（女歌手）。Gin Lee受訪時透露，已經開始籌備下一張專輯，希望5月可以推出新歌，預告會係一首抒情歌，但唔係情歌，而係關於追夢嘅勵志作品。

講到好友YT搵JACE拍MV玩自製緋聞惹網民不滿，Gin Lee就搞笑話自己做人一向好小心，係「謹慎型」，新歌唔係情歌，宣傳手法唔使太驚喜。佢又澄清自己一早知YT同JACE只係拍MV，所以之前喺YT嘅合照下留言「恭喜」，純粹係賀對方出新歌，唔係支持佢哋玩緋聞。Gin Lee仲話YT同JACE不嬲都係「老best」，唔覺得佢哋之前有眉來眼去。最近Gin Lee要兼顧頒獎禮、英皇晒冷騷、出歌同拍MV，忙到透唔到氣，由於英皇騷撞正CHILL CLUB頒獎禮，佢希望可以兩邊都出席，笑言已經準備好平底鞋跑住連走兩場。