走過歷史大地｜黃翠如爆磨合2日重拾默契 洪永城羅馬做「角鬥士」圓夢：人生已無憾.由黃翠如同洪永城（Tony）主持嘅《走過歷史大地》今晚（15日）9點半翡翠台首播。日前二人同幕後團隊舉行慰勞宴，齊齊率先睇第一集。翠如同Tony感謝團隊付出，令畫面更豐富。Tony笑言：「將我哋一個冇趣嘅人，入到AI變得好有趣。」翠如就話：「好驚我哋實地拍攝會比較失色。」翠如仲爆Tony自言「行緊大運」，所以一定有好收視，全場爆笑。

今次係二人相隔7年再度合作，佢哋接受tvb.com獨家訪問時透露，磨合咗兩日先至重拾昔日火花。翠如話：「我哋同呢team人都係第一次合作，所以大家要互相磨合。我真係好耐冇開工，好緊張，甚至同導演講想睇playback，睇吓我哋兩個一齊嘅節奏同火花有冇好似以前咁。」Tony就話過咗兩日，默契已經回復以前嘅九成，包括恰翠如嗰部分：「梗係有，呢九成係包埋恰佢，當然都係充滿窩心嘅恰，希望觀眾覺得得意同搞笑。」

兩人對節目中嘅AI技術讚不絕口。Tony話：「由現代轉變到古代，古代去返現代嗰啲transition做得好好，簡直係非常頂級高水評。」翠如就坦言初時擔心AI同歷史放埋一齊會唔夾，但見到出街畫面好驚喜：「幕後團隊功勞好大，唔單止呈現AI歷史，仲將我哋嘅性格放埋入去，連造型都不停轉。第一集講金字塔，AI穿插得好有用，唔係為AI潮流而做。」

Tony今次一嘗滑翔體驗，仲感觸到流淚，佢話真喊唔係做戲：「我一上機已經眼濕濕，全程好感動。分析過因為我好耐冇試過好刺激嘅嘢，所以好感觸，真係要去多啲旅行，重拾對人生嘅激情。」問到最難忘嘅地方，翠如最鍾意埃及：「以前讀書有讀點解要包mummy，睇電影都睇過，但今次因為AI，我哋有份現場睇，好似喺歷史入面有份見證，好精彩。」Tony就話意大利最難忘，因為佢一嘗做「角鬥士」嘅心願：「《帝國驕雄》係大部分男士心目中最佳電影，大家都想成為角鬥士。我今次做到角鬥士，對付猛獸同參與古羅馬歷史呢一刻，我覺得人生已經無憾。」