《破地獄》班底新戲秘密開工 傳湯唯陀B辭演 林嘉欣捱義氣頂上.由陳茂賢執導，許冠文、黃子華、衛詩雅、朱栢康主演嘅電影《破‧地獄》，港澳票房大收1.7億，成為香港電影史上票房冠軍，喺金像獎更令衛詩雅登上影后寶座，朱栢康奪男配。由於作品叫好叫座，陳茂賢下一部作品幾時開拍，一直係行內熱話。原來劇組已經秘密開緊工，除咗《破‧地獄》完整班底重聚，新加盟嘅仲有金馬影后林嘉欣擔任女主角，不過據消息指，今次加盟一波三折，更加係臨時上陣幫忙。

據《香港01》收到嘅消息指，陳茂賢接手劇本後，已密謀讓《破‧地獄》班底重聚，投資方更想將陣容加碼，除咗群星客串，女主角更想由國際級影后擔任。首選係2023年憑《媽的多重宇宙》奪得奧斯卡影后嘅楊紫瓊，可惜多次溝通都未能擠出檔期。

之後劇組轉向湯唯，佢初出道憑《色｜戒》一鳴驚人，2022年再憑《分手的決心》橫掃多個國際影后獎項，雙方已洽談得如火如荼，但46歲嘅湯唯喺4月29日透過社交平台宣布懷上第二胎，要為新生命全面停工。呢個「喜訊」殺劇組一個措手不及，由於其他演員檔期已定，拍攝期不能再拖，結果喺千挑萬選下，由金馬影后林嘉欣補上。佢憑《百日告別》於2015年登上金馬影后寶座，加上與男主角黃子華關係要好，子華神更以「大佬」相稱，默契已有。嘉欣亦非常欣賞《破‧地獄》嘅創作班底，接獲邀請後立即重新調配工作，全力配合拍攝。消息指劇組已秘密開工多時，預計7月底煞科。