愛回家｜呂慧儀湯盈盈面臨「失業」笑言轉行做道具化妝：我哋周身刀！.無綫長壽處境劇《愛．回家之開心速遞》傳出將於7月正式落幕，新處境劇《愛．回家之三代同糖》已秘密「埋班」進行造型。劇中靈魂人物「熊若水」呂慧儀與「高栢菲」湯盈盈現身宣傳活動，接受訪問時大談心聲。

對於劇集是否7月完結，呂慧儀笑言目前仍係「傳聞」：「我哋都未收到正式通知，都係聽返嚟嘅啫。」提到新劇《三代同糖》已開工，湯盈盈話目擊新劇演員造型：「我哋食Lunch嗰陣見佢哋經過，仲遠遠影咗相！」不過兩人話暫時未有安排加入新劇，呂慧儀解釋：「我哋而家一定未有著落，因為呢度未完，唔可以轉造型，要完咗嗰日先再諗。」

面對相處近十年嘅台前幕後即將告別，兩人都好感觸。呂慧儀話：「計埋之前開會籌備，真係有10年。同事之間多咗懷念嘅時間，我哋想集中多啲心思拍好個結果，而家唔適宜諗之後做咩。」湯盈盈就話：「我而家係打算忍淚，我唔想喊，但我知道之後自己一定會喊。」

面對「失業」危機，兩人盡顯樂觀幽默。呂慧儀笑言呢十年訓練令佢哋學識十八般武藝：「放心！我哋個個都周身刀，到時可以幫手做道具、化妝。一件事歸一件事，船到橋頭自然直。」湯盈盈仲搞笑話：「我頭先喺度批緊啲筆，諗緊嚟緊做化妝師，已經搵咗幾個師傅做徒弟。道具部、化妝部都可以去，睇吓佢哋請唔請實習生。」

如果真係有假期，兩位媽媽級演員都話想多啲時間陪子女。呂慧儀話：「如果未開工，咪有時間湊下小朋友，擺多啲時間喺教育中心，陪下小朋友放暑假。」至於會唔會旅行，佢笑言機票同油價太貴：「而家旅行好貴啊，等啲油價跌返先啦！或者去長洲坐船算啦！」湯盈盈就話會同家人去個短trip，不過要等完咗劇先諗。