【娛樂新聞】吳偉豪郭柏妍否認共用飲筒戲假情真 澄清屬角度問題：冇掂到㗎.無綫劇《飛常日誌II》今日（21日）在中環碼頭舉行Busking活動宣傳，尾聲時眾人叫出名是「魔音」嘅郭柏妍（Rosita）唱歌，期後負責伴奏嘅陳建文就起歌，問佢：「呢首你識唔識唱呀？」原來係生日歌！此時郭柏妍悄悄捧出一個生日蛋糕，為戲中男友——昨日（20日）生日嘅吳偉豪（Ricco）慶祝28歲生日，之後眾演員更為Ricco大合唱生日歌送上祝福。

吳偉豪接受《01娛樂》訪問時透露生日正日都要開工，之後就回家陪伴家人，因為上周已一家人食飯，慶祝他和二哥生日，以及今日的父親節。郭柏妍就恭喜他在工作中度過，祝他繼續有很多工作。訪問中記者叫郭柏妍再唱多次生日歌，佢於是唱了「Happy birthday to you!」笑稱自己嘅歌藝係28年磨一劍，唱起嚟都好有專業精神。

日前，吳偉豪與郭柏妍一同拍短片，文案中寫道：「每次都選到我喜歡的。」片中兩人各拿著一杯飲品，並各自喝了一啖，之後郭柏妍拿了吳偉豪手中的飲品後，就毫不避忌地啜了起來，被質疑係共用飲筒，網民更認為呢種間接接吻方式堪比接吻，非常親密。吳偉豪澄清：「我諗係Angle嘅問題啫，其實可能我冇掂㗎嘛！」Rosita亦說：「佢冇掂到㗎，因為我哋拍嘅時候都已經傾好晒。」Ricco再表示，其實拍之前已怕引起誤會，解釋：「我哋好驚就係有呢啲情況出現，點知就有啲咁嘅情況出現，就算避免咗，都出現，都冇計。」

對於會否戲假情真，Rosita話：「戲假情真上一季就已經係戲假情真咗啦，我哋冇呀，今季我記得好似有一個訪問，話我哋都隔咗一年……一段時間先再拍，我哋都係需要warm up嘅一啲人。」吳偉豪亦指上一輯甚至不是情侶關係，只係後來先一齊。被問起劇中嘅拖手情節，佢指唔係重點，純粹因為二人在劇中是情侶，拖手十分平常。現實中郭柏妍比吳偉豪大幾個月，但看上去似乎男方大少少，佢即笑言：「我入行已經俾人話個樣老，可能我細個就帶定咗個樣啦，希望我再大個都係咁。」對於能否接受姊弟戀，吳偉豪冇乜所謂，佢覺得歲數只係一個數字，自己唔太在意；而郭柏妍則認為年紀大小影響不大，最重要性格合得來同想法接近。

日前TVB剛宣布今屆12位入圍港姐佳麗名單，其中一位陳梓穎被指似郭柏妍，陳梓穎受訪時趁機賣口乖：「這是我嘅榮幸！我有睇佢好多劇集，包括而家嘅《飛常日誌II》。我自己都覺得眼睛同笑起嚟嘅時候有啲似。」當記者將陳梓穎照片展示畀二人時，吳偉豪率先話：「我真係以為係你嚟喎，真係有啲似喎！」郭柏妍多謝陳梓穎嘅稱讚，被問覺得似唔似，佢話：「我覺得大家有大家嘅靚，唔知會唔會碰到面，但我會努力繼續去做好我嘅演員角色，希望develop多啲唔同嘅方面，做得更加好，成為我自己嘅榜樣！」

此外，今屆港姐全部佳麗都要開設一個全新嘅官方IG，未知與早前盛傳TVB藝人需交出自己社交平台有冇關，當時郭柏妍曾被指因拒交IG賬號資料而被雪，但近日佢有戲上，亦有份宣傳，問佢認為佳麗們要開新IG是否好事，佢指自己未有太留意報道，但坦言：「我覺得睇公司安排，好多都係睇公司安排，我個人都交咗俾公司。」問到公司是否擔心佳麗們有黑材料流出，佢相信唔係：「我諗都唔驚嘅，冇嘅冇嘅，大家都係想港姐件事做得好，每屆香港小姐都好好，又俾一個好好嘅平台大家去進步，咁樣可以搵到自己，唔好嘅地方去變返好。」當問到郭柏妍嘅IG現時係咪由自己管理，佢表示：「都有恆常出吓啲post，都有跟公司嘅安排出吓。」

最後，講到《愛．回家之開心速遞》倒數在即，日前吳偉豪與周嘉洛、林凱恩及科莫多龍「小Bon」拍片，觀眾跪求「安Bon」（金城安與Bonnie）復合，亦有人希望「朱凌凌」可以在大結局前找到個伴，問到餘下集數可會有轉機，吳偉豪叫大家許願：「《愛回家》劇組係好順民意，所以如果網民想要啲乜嘢，就即管講出嚟，如果你哋講，我諗九成九真係會發生！」此時郭柏妍話：「我係吳旺達嘅新娘嚟㗎！」吳偉豪即表示，日前拍了一場戲，都有提及過郭柏妍，佢聽後非常興奮，更話：「吓！真係㗎？我好期待呀如果有機會嘅話，因為真係拍得好開心，我係吳旺達新娘呀，仲可唔可以返嚟呀？」

今日嘅Busking上，先由戴祖儀唱出片尾曲《飛常道》，佢表示隨時會遞咪叫演員們一齊唱，並看向朱敏瀚方向，誰知都未開始，朱敏瀚一舉起咪想Say no，一下令戴祖儀被咪撞到牙齒，不但企都企唔穩，更險些撞崩牙，場面十分搞笑！戴祖儀唱完之後，到張馳豪演繹劇中角色演繹過嘅《非走不可》（原唱：謝霆鋒）；而適逢父親節，鍾柔美就翻唱陳奕迅嘅《單車》。