【娛樂新聞】周星馳公布新片映期 《功夫女足》7月迎戰《魔海奇緣》《多啦A夢》.今日（22日）係「星爺」周星馳64歲生日，佢喺社交平台發布短片，親自宣布新作《功夫女足》（原名《少林女足》）正火速進行後期製作，並預告將於7月上映。不過，七月份嘅暑假檔期猛片雲集，《功夫女足》將會迎來一場硬仗。

星爺喺片中透露：「我在努力趕7月10號。」當被問到如果趕唔切點算，佢話「那就7月17號囉。」再被追問如果都係趕唔切呢？星爺就霸氣回應：「那總有一天趕得上啊。」呢個充滿「星式幽默」嘅回覆，被網民笑指係「彈性定檔」，認真估佢唔到。

《功夫女足》由星爺自編自導，故事講述少林功夫與傳統足球結合，聚焦女足「峨眉隊」奇蹟逆襲奪冠。演員陣容相當強勁，包括張小斐、迪麗熱巴、張藝興，更邀得前女足國腳趙麗娜及李佳悅驚喜演出，韓國影帝宋康昊亦會跨界客串裁判一角。

如果《功夫女足》順利喺7月10日上映，將會迎戰提前一日（7月9日）開畫嘅迪士尼真人版巨作《魔海奇緣》，呢場中西票房大戰肯定激烈。萬一後期製作要延遲到7月17日，對手亦唔嘢小，包括7月16日上映嘅合家歡動畫《電影多啦A夢：新・大雄之海底鬼岩城》，以及史詩式動作大片《奧德賽》。面對動畫與科幻嘅雙重夾擊，星爺今次要「破網而出」，真係要出盡全力先得。功夫女足