【娛樂新聞】港姐外景泳裝拍攝 魏欣鄧匡閔身形突圍跑出 譚雅文腹肌搶鏡.無綫年度盛事《2026香港小姐競選》內地一連七日外景拍攝進行得如火如荼，重點泳裝環節安排於昨早進行。12位候選佳麗換上清一色泥黃色兩件頭泳衣，浩浩蕩蕩前往衡山五號山谷懸崖民宿拍攝，惟天氣不穩，現場湧現濃霧兼落雨，影響拍攝進度。原本佳麗們於一望無際的泳池展示靚人靚景，最終卻「景觀失蹤」，加上雨後天氣轉涼，每次完成拍攝佳麗們便急急披上雨衣擋風。

今屆佳麗身形平均，未有「波霸」現身，擁34.5吋上圍的魏欣及鄧匡閔已算「有料」，後者更擁有1米74身高及54.7公斤體重，成為本屆「佳麗之最」。譚雅文趁機大騷腹肌，陳梓穎則展現模特兒骨架，成功搶焦。鄧匡閔受訪時坦言自己骨架大，身形仍有待改善，對於被發現有小肚腩，佢話應該同長期坐姿不正確有關：「都希望可以喺跟住落嚟嘅比賽訓練體態，坐姿端正等肚腩仔可以收番啲。」問到有冇為泳裝拍攝節食收身，佢同魏欣都話飲食以少鹽、少油同減碳水為主。

魏欣小蠻腰僅得22吋，被記者打趣問會否「負荷」太重，佢話自己嘅身材或與長期健身操線條有關，近年主力做瑜伽練肌肉，仲笑稱曾練出馬甲線，如今會努力令馬甲線再現人前。譚雅文就話唔係為參選而努力操肌，只係一年前返港後想有更好線條先開始做運動。對於被指有模特兒身形，佢謙稱：「其實大家都睇到所有佳麗都好靚好弗，所以我覺得冇着數得幾多。（覺得邊個係勁敵？）咁又唔會去諗呢啲，我想做好自己先。」

袁絲珩話外景拍攝時間緊湊，冇時間食正餐反而有助Keep Fit。對於骨架大肩膊橫，外觀上有啲輸蝕，佢都認同：「所以我哋嘅體態老師都有教我哋點樣擺甫士可以睇落去冇咁橫，因為點瘦都係睇落去呢一個位闊，所以靠做一啲姿勢去補救番。」湯家琳被發現肚皮上有黑印，佢解釋因為幾個月前出水痘：「到依家都仲未消晒，唔係皮膚問題。」

大熱之一嘅李澤欣，前日穿旗袍拍攝時話唔會刻意節食減肥，完成工作後「放飯」即開啟「大胃王」模式，將盤中食物「秒清」，只淨低葱花同醬汁，仲幽默喺相片上寫「秒清」二字，結果喺尋日泳裝環節「出事」，驚現「肚腩仔」。佢受訪時坦言身形上仲要再努力，因為上鏡會顯肥，Catwalk同擺甫士都要再下苦功。佢話好欣賞譚雅文同魏欣嘅身材：「譚雅文真係好弗！見到佢體脂比較低，好正！成個模特兒咁！（覺得自己身形的骰輸蝕？）我覺得係嘅，但每個人有唔同身形，我覺得如果自己接受、舒服就OK！」

李澄晴話有為泳裝拍攝而「少食多餐」，仲有特意操練，希望雙腿顯瘦，暫時最滿意自己嘅腰肢。對於有小肚腩，佢笑話：「因為尋日食咗啲嘢未消化，哈哈！尋晚拍到好夜。（食嗰陣時有冇考慮要着泳衣？）但係我驚餓暈嘛！」相當搞笑。

盧蔚晴經過大會「改造」後越見省鏡，不過佢謙稱可以更弗，仲話會向譚雅文偷師。問佢覺得邊個部位可以再操弗，佢先笑而不語，然後話：「會勤力啲做普拉提。」問到會唔會想改善「包包面」，佢笑問：「你覺得我有包包面？」身旁譚雅文即幫口大讚佢好可愛：「好Sweet、好甜呀！」提到盧蔚晴臀部現橙皮紋，問佢係咪曾係肥妹仔，佢笑問邊個位置，更搞笑話：「唔係人人都有㗎咩？哈哈！會做Gym改善。」講到同佢一齊參選但未能入圍嘅家姐，盧蔚晴話二人每日都會視像通話，分享出外景所有見聞：「覺得所有嘢都係一個好新奇嘅體驗，第一次面對咁多傳媒、好多美麗嘅佳麗、有好多老師教我哋。（家姐好羨慕？）我唔知呀，哈哈！」

TVB