【娛樂新聞】魏欣臉上凹痕惹整容疑雲 大方解畫：我唔完美，但多謝爹哋媽咪.《2026香港小姐競選》12位候選佳麗近日到湖南拍攝外景，眾人以華服造型現身南岳里古鎮，於古色古香嘅場景中進行拍攝。5號魏欣身穿鮮紅色華服，分外搶眼。佢接受訪問時話揀呢套衫唔係因為性感，而係因為顏色鮮艷同鍾意飄逸嘅感覺：「其實呢套衫唔係最性感嘅outfit，我揀呢套衫係因為顏色，第二因為我鍾意呢套飄逸嘅感覺。」拍攝期間一度跌膊，佢笑言已用膠紙黐好：「而家黐咗，我有少少off shoulder，好容易跌。而家咁樣端莊啲。」

魏欣臉上被發現有奇怪凹痕，隨即惹來整容疑雲。佢解釋：「貓咪紋，我爹哋同grandfather都有，呢邊都有，唔係好明顯。」被問到會唔會怕俾人話整容，佢強調：「我純天然。（個鼻都係？）都係真。」佢坦言自己唔完美，笑起嚟有少少紋，眼睛亦唔對稱，但感謝父母：「我唔完美，但係⋯⋯係啦。（咁靚，會介意被指整容？）咁，咁我靚囉。好多謝我爹哋媽咪啦，心裏有時會hurt，但係呢，做好自己。」講到將來會否考慮整容，佢話父母一定唔會批准，大方又淡定。TVB