【娛樂新聞】朱千雪懷二胎20周狀態曝光 手腳纖幼顏值零走樣 自爆比首胎更焦慮：因為知道要經歷咩關卡.現年37歲嘅前港姐季軍朱千雪（Tracy），近年淡出幕前轉型成為大律師，憑甜美知性形象同專業成就，被譽為「TVB學霸港姐」。繼2024年誕下兒子Justus後，今年5月佢再度報喜宣布懷上第二胎，實現三年抱兩。近日佢喺社交平台首次公開懷孕近照，並撰寫長文剖白二次懷孕嘅真實心情。

從朱千雪分享嘅最新相片所見，懷孕已踏入20周嘅佢狀態極佳。身穿藍白直間鬆身恤衫裙，腰間簡單繫上布帶，雖然腹部微隆，但整體身形依然纖瘦，手腳完全冇水腫，得天獨厚。招牌甜美笑容配上完美無瑕嘅皮膚，女神風采依舊，顏值零走樣。

不過，同第一次懷孕嘅喜悅相比，朱千雪坦言今次心情更複雜：「今次有更多嘅焦慮，因為你已經知道接下來必須經歷邊啲關卡；但同時又多咗一份釋懷，因為知道自己以前曾經做到過。」佢透露第二次懷孕嘅身體變化來得更快，但休息時間因要分身照顧大仔而大減，同時要喺繁忙嘅法律事業同陪伴孩子之間取得平衡，令佢不禁自問：「自己係咪仲做到？」

儘管挑戰重重，朱千雪依然抱持學習心態積極面對，話呢段旅程已成為一次新嘅學習經歷，令佢學會更加獨立、更好管理時間，每日都心懷感恩。大批網民紛紛留言送上祝福，叮囑佢再忙都要好好保重身體，期待二寶順利降生。TVB