【娛樂新聞】郭富城親證年底啟德開騷 成四大天王第一人 護妻反擊花邊新聞：太太係溫馴女仔.郭富城今日（27日）以馬年大使身份現身跑馬地馬場，出席「冠軍人馬獎候選馬匹公布儀式」。身兼大使、馬主及愛馬之人，城城坦言要從候選馬匹中選出心水「馬王」亦很困難。佢開心見到「嘉應高升」與「浪漫勇士」兩匹香港駿馬在國際賽事贏得好成績同創下紀錄，又話入場欣賞馬匹對佢而言係家庭活動：「希望小朋友見識到馬匹長期受訓練都未必做到好成績，可以學習到勇往直前、永不放棄嘅精神。」佢笑言有令女兒喜歡馬、有學騎馬，雖然女兒都會睇佢演唱會，但最鍾意嘅係BABYMONSTER。

城城證實年底將於啟德主場館舉行演唱會，成為四大天王中首位登上該場地嘅歌手。佢透露12月將會係重要日子，被問到係咪聖誕節，城城大賣關子只稱快將公佈：「作為一個歌手，紅館開咗好多次，心裡面想可以征服啟德，而我都親自去過呢個地方，為杰倫做過嘉賓感受過。我問團隊有信心嗎？大家都話有，咁大家一條心征服啟德，希望開一個從來都冇咁精彩過嘅騷。」城城表示場地同團隊已著手準備，每星期開會，笑言快將公佈等大家可以快啲搶飛。被問到想開幾場，佢笑言一場都滿足，希望演出吸引國內外歌迷，刺激旅遊業。佢又話雖然開騷無數次，但每次都有壓力，有壓力先可以將演出推上更高層次。

至於太太方媛早前參與內地綜藝節目拍攝，城城透露已結束，因太太本身冇參與過類似工作，太太問佢時都支持佢，知道佢學習到好多、亦好辛苦。對於太太被指拍得唔開心，城城稱都係花邊新聞。被問到太太稱難融入佢嘅朋友圈子，城城話冇辦法，因為太太唔係藝人，不同圈子有不同事要面對：「作為丈夫，太太有呢個想法，想接觸唔同嘅世界我當然支持佢。呢種事、參與節目本來就唔容易，但佢可以做唔同嘅事、不止湊BB，可以挑戰自己，我都很鼓勵佢。」佢又話太太係「溫馴女仔」，經過今次會學懂適應，好多事唔使介懷。