【娛樂新聞】陳豪爆細女學做音樂劇 唔怕歌藝被超越：我攞過獎㗎！.視帝陳豪（阿Mo）與太太陳茵媺（Aimee）今日（27日）以夫妻檔出席活動分享理財心得。陳豪表示男主外女主內，太太就係家中嘅CEO：「男人賺錢，攞晒返屋企畀老婆，句號。」Aimee則指大部分花費用在三個子女身上，最重要取得平衡：「要學好多嘢、又要食嘢、有時都要去旅行。」佢坦言有三個小朋友，管理家中財政必須諗過度過，要考慮儲蓄成分，唔可以只顧使錢。

談到小朋友學習，陳豪話要先讓小朋友找到自己嘅興趣與方向再加以栽培：「始終小朋友無論學費、生活費、補習費，再加埋長遠年紀開始越大使費越多，所以理財方面要搞好啲，譬如教育基金同保險。」Aimee指大仔已屆中一階段，仍在摸索學習興趣，佢笑言學數學同中文係「媽咪嘅興趣」，希望小朋友語文基礎打好。陳豪透露大仔近來學冰上曲棍球，細女則剛面試學音樂劇，又唱又做戲。問到會否擔心歌藝被女兒超越，陳豪笑言：「我攞過獎㗎，哈哈！」佢又話同阿女講，做歌星最重要係膽識同自信心，肯落苦功同時間訓練就能提升技術。

除咗學業，Aimee話有教小朋友理財，重點係「應使則使」，購物前要考慮清楚，亦要學習儲蓄。陳豪爆三個仔女有各自理財方案：「大仔好慳，但見到鍾意嘅嘢會格價，攞到性價比至買。二仔再慳啲，淨係買平嘢，結果買一大堆唔要嘅嘢，主力儲錢。」Aimee笑指細女就「唔好諗，使咗先」，好鍾意買嘢畀阿哥大家一齊食。

談到投資取向，Aimee坦言係個保守嘅人，會將錢放定期存款收息。被問到陳豪送咩「心意」作生日和結婚周年禮物，Aimee笑謂唔講得，又話其實唔一定要買嘢，可以一齊食飯、有私人時間已經好難得。講到Aimee早前網晒單人婚紗照慶祝結婚13周年，惹來婚變傳聞，Aimee話全不知情：「Flash back嚟㗎！下次會將Flash back寫喺相上面。」陳豪即笑指好多人只睇相唔理文字，兩公婆一唱一和，盡顯恩愛。