【娛樂新聞】盧映彤告別《Hands Up》專注女團發展 感恩「大家庭」包容：帶住學到嘅嘢繼續闖.盧映彤（Skylar）早前憑節目《魔音女團》人氣急升，成功以實力突圍，成為女團「MYNT」六位成員之一。其實喺成團之前，Skylar亦係兒童節目《Hands Up》嘅主持之一，以親切嘅「彤彤姐姐」身份深受小朋友喜愛。

近日Skylar喺社交網透露已於《Hands Up》正式「畢業」，上載與幕後工作人員食飯嘅溫馨合照，感性留言：「喺呢個Handsup family嘅愛裏面成長，感激一切喺Handsup嘅不期而遇，會帶住所有學到嘅嘢，繼續往新嘅目標出發！好感激大家對我呢個小魔怪嘅包容同愛護。」

Skylar接受tvb.com獨家訪問時透露，自己參與《Hands Up》兩年時間，畢業後將全面專注女團發展。對於要離開呢個陪伴佢成長嘅節目，佢非常感恩幕後團隊嘅幫助與教導，最唔捨得呢個充滿愛嘅大家庭：「監製文哥就好似爸爸嘅角色，入去之前記得佢同我講話當係一個成長嘅地方，如果覺得我成長咗就會放我出去闖蕩。而導演同Writer佢哋就好似監護人咁，一直監督住我。我係裏面最調皮嘅主持，但係佢哋都好包容我，接納我呢個大細路去領導啲小朋友。」

除咗幕後前輩嘅照顧，Skylar更直言喺節目中收穫難能可貴嘅友情：「最驚喜嘅係喺裏面收穫好多友誼，相處得好和睦，成日開廠嘅時候就一齊叫外賣同食飯，休息時間又會傾偈，令到啲時間真係過得特別快。」佢話會帶住所有學到嘅嘢，繼續向新目標進發。

TVB