【娛樂新聞】朱敏瀚認「負了」戴祖儀承諾全包醫藥費 分手後寄情工作與工作「拍拖」.朱敏瀚、戴祖儀昨晚（26日）現身香港機場，與觀眾一齊收睇《飛常日誌II》大結局。劇集首周最高收視21.2點，觀眾高達136萬，成為2026年截至6月首周最高收視劇集，成績理想。司儀陸浩明叫朱敏瀚除衫找數，朱敏瀚爽快除外套，着住背心騷麒麟臂，笑言：「拍劇成日喺機場當咗呢度係屋企，返屋企除衫係好正常嘅。」佢更拉埋張馳豪同周嘉洛落水，但周嘉洛立即扣起衫鈕，唔肯除衫。

現場藝人各自搵粉絲玩遊戲，朱敏瀚抽中大獎，認真有運。不過早前佢意外令戴祖儀撞崩牙，被祖儀要求負責任。昨日祖儀門牙仍未修補，講笑門牙像一把刀，可以做刀嘅代言人，透露現在食雪糕會有痹痛，變咗敏感牙齒。佢自爆撞崩牙消息曝光後，收到好多牙科診所主動聯絡願意提供幫助，但佢希望朱敏瀚做個負責任男人，所以希望佢出醫藥費。朱敏瀚即時表示會聯絡自己相熟嘅牙醫，願意全數負責費用。祖儀讚佢經常慰問，係負責任男人，兩人更對鏡頭重演一次受傷經過，場面搞笑。

被問到有冇曾經負過女仔，朱敏瀚笑話第一次負咗女仔嘅牙齒，真心內疚，但冇負過女生。早前宣布回復單身後，佢同緋聞女友陳曉華關係降呢做返同事，冇再聯絡，惹來分手唔開心嘅猜測。朱敏瀚回應：「希望大家都健康和工作順利，唔好寫到是敵人，我哋唔係，希望大家都開心。」對於關係未能再進一步係咪可惜，佢話：「未來嘅事大家都意料不及，成件事係正面開心。」透露自己透過工作同運動保持狀態。

戴祖儀大讚朱敏瀚除咗高大威猛靚仔有型外，也非常善良同溫柔，所以唔需要以牙還牙，仲爆佢最近拍打戲打到手腫。朱敏瀚表示戲中打人也有被打，開工一個月，現在寄情工作，同工作「拍拖」。TVB