【娛樂新聞】非份之罪｜施焯日首演輕度智障獲陳煒貼心指導 胡敏芝演狂迷與羅冠蘭衝突 葉靖儀感激賴慰玲暖心照顧.《非份之罪》將於下周一（29日）在翡翠台播出，劇集以六個單元故事帶出人性貪念與非份之想，展現「現實比戲劇更荒謬」。除咗吳啟華、陳煒、賴慰玲、羅冠蘭和徐榮等好戲之人外，多位新晉演員亦表現亮眼，獲監製王心慰點名力讚。

現年26歲嘅葉靖儀參選《2021年香港小姐競選》入行，喺單元《石棺禁戀》中與賴慰玲和鄧智堅有唔少對手戲。呢套劇係佢入行以嚟戲份最多嘅一次，葉靖儀坦言接拍初期好緊張，好彩監製細心解釋角色背景，令佢更了解自己嘅角色。佢大讚賴慰玲同鄧智堅係好好嘅前輩，賴慰玲好似大姐姐咁照顧佢，幫佢分析每場戲嘅層次，鄧智堅亦不時同佢對戲，令整體效果更好。

現年25歲嘅施焯日參加2019年TVB訓練班入行，早前喺《正義女神》嘅演出獲佘詩曼公開點名大讚。今次佢喺單元《一億殺機》中首度挑戰演輕度智障人士，坦言難度在於拿捏智力程度要精準，令觀眾睇得出有少少問題但又唔會太誇張。施焯日透露陳煒喺拍攝前特意約佢參觀輕度智障學校，等佢觀察並將所見所聞放入角色，貼心舉動令佢獲益良多。

現年27歲嘅胡敏芝2021年參加TVB藝員訓練班入行，今次喺單元《危險遊戲》中飾演吳偉豪嘅狂迷，角色戀愛腦、做事冇底線，佢直言好有挑戰性。劇中胡敏芝同羅冠蘭老師有唔少對手戲，更大爆有衝突場口。佢話羅老師好親民，係一位好好嘅前輩，未到佢埋位時會睇對方做戲偷師，開廠時晚晚一齊食飯，羅老師亦會同佢分析點樣做得更好，獲益匪淺。